Wie hat d’r ’t gehad ?

Wie woar ’t óp vakans? Sjoeën? Vöal gezieë? Good weer gehad?
Gouw rees? Ging files?
Dees zint zoeë óngeveer de sjtandaardvroage die me gesjteld
kriet as me truuk is van vakans. En was te zoeë-al beleëfd has...

’T is dat d’r drum vroagt, angesj houw ich Uch nieks d’r va verteld.
Mè umdat d’r zoeë bliet aadringe....alli da mar.
Vier houwe geboekt vuur Beieren in ’t Dütsj en v’r ginge mit d’r
vlieger vanaaf Düsseldorf. De rees doert kaom ing sjtónd, mè 2
sjtónd van te vure mós te v’r doa zieë.
Dat woare v’r óch, nog ieëder zelfs. Koffere igecheckt, zote v’r te zitte...
Dudelik te zieë welke lüj nog noeëts gevloage hant. Wie durch wespe
gesjtoake, vlege ze aanhouwend óp went wer get weëd aafgerope.
Ze mótte juus wie vier geweun effe noa München.
Mè neë, zie zint óp van de nerve al weëd get uëver vertraging noa
Rio de Janairo gemeld.
Totaal oet ’t hüske wete ze zich ginne road. Zitte v’r hei waal
good Haarie had ing vrouw al tich kier gevroagd.
Enfin, noa de gebroekelike vertraging, zitte v’r endlig in d’r vlieger.
Vuur ópstiege en lande weëd aabevoale um aanhouwend en good te kouwe,
want dat woar hieël good vuur de oere, zag de stewardes.
Vier zote neëve d’r Haarie en zieng vrouw die d’r wieze road van de
juffrouw zier good houwe ópgevolgd.
Mè ee werk dat mieng vrouw en ich han gehad um deë kouwgoemie
bei dön oet de oere te kriege.....Neet te geleuve!

’T pleëtsjke woeë v’r woare, woar ee gezellig groeët dörp en ’t hotel
woar prima. Good eëte, en de kamer woar reen en bekwieëmlig.
De lüj woare vruntelik en repe aanhouwend ’grüs Gott’. Ich han gezag
dat ich de groete zouw uëverbringe.....
’sAnger daags woeëte v’r al vreug wakker van ee ónweer en d’r ganse
lamlendige daag hat ’t gereënd en neet zoeë bietje !
De volgende daag woar ’t aaf en touw druëg tusje de buie en da toefelde
v’r get durch de umgeëving. Verduld sjoeën mót ’t doa zieë went ’t good
weer is. Vier probeerde ós dat vuur te sjtelle wie ’t doa zouw zieë as
de zón ópkump boave die berg.....
D’r hotelbaas vertelde ós oetveurig uëver d’r zónnewiezer deë óp zie
terras sjtóng en woeë v’r good óp kóste zieë wie laat ’t woar.
Vier wete noe nog neet wie laat ’t doa woar, want v’r hant bauw
ummer reëge gehad.
Zage en sjrieve inne daag woar ’t druëg en doe hant v’r mit ’t
gezelsjap ee oetsjtepke gemak noa ee soat grot woeë-in inne kluizenaar
gewónd zouw han. Nou dat woar de muite weëd: met 16 man noa ee loak in
kieke woeë nieks te zieë woar.... D’r woare zelfs lüj oet ózze groep
die doa tich foto’s van makde. Hils te ’t vuur meugelik? En trouwens; wat
interesseert mich zoene kluizenaar? Houw heë zich mar ee vak mótte liere !
D’r noa langs semtlige souvenierkröamkes gelope en doe wer truuk want
’t begós wer ópnui te....reëgene.
D’r Haarie mit de vrouw houwe zich oerdöpkes gegolle vuur in ’t
vleegmesjieng en dat holp good, repe ze later keihel durch d’r vlieger....... !

Wer heem, vinge vier ’t mieë wie geweldig. Gee gedeuns en gesjravel.
Kót gezag: nurges bis te mieë heem wie heem. De herfsmoande die noe
vúúr ós ligke, kinne verduld gezellig zieë um nog ins truuk te dinke
an de vakans.....
Umdat dier ’t zoeë geer woolt wete, angesj houw ich ’t Uch gaar neet verteld.